Бишкек, 04.11.26. /Кабар/. Борбордук шайлоо комиссиясы 2027-жылдагы президенттик шайлоого даярдык көрүү алкагында Бишкектеги эки жогорку окуу жайда шайлоо системасын тестирлөөдөн өткөрдү.
БШКнын маалыматына ылайык, сыноо күн мурун саат 10:00дөн 15:00гө чейин жүргүзүлдү.
Анын жүрүшүндө шайлоо модулунун иштеши, системанын туруктуулугу жана шайлоочуларды онлайн идентификациялоо механизми текшерилди.
Аралыктан добуш берүү системасы жарандарга туруктуу катталган жеринен тышкары, өздөрү тандаган шайлоо участогунан добуш берүү мүмкүнчүлүгүн түзүүгө багытталган.
Бул тестирлөө жалпы республикалык сыноого даярдыктын алгачкы этаптарынын бири. Жалпы республикалык тестирлөө 2026-жылдын 18-ноябрына пландалган.
Эскерте кетсек, Кыргызстанда президенттик шайлоо 2027-жылдын 27-январына дайындалган.
