Бишкек, 11.02.25. /Кабар/. Салык кызматында салыктык башкарууну жакшыртуу жана электрондук сервистери менен интеграциялоо маселелери боюнча банк секторунун өкүлдөрү менен жолугушуу өттү.
Ведомстводон билдиришкендей, кеңешмеге Салык кызматынын төрагасынын орун басарлары Кубанычбек Ысабеков жана Нурлан Үмтулов, Кыргызстандын банктар союзунун президенти Анвар Абдраев, ошондой эле Улуттук банктын жана коммерциялык банктардын өкүлдөрү катышты.
Жолугушуунун негизги темасы Салык кызматы менен банк секторунун ортосундагы өз ара аракеттенүүнүн натыйжалуулугун жогорулатуу боюнча иштер, ошондой эле салыктык жол-жоболорду жөнөкөйлөтүү максатында электрондук сервистерди интеграциялоо болду.
Салык кызматынын адистери банк секторуна административдик жүктү азайтууга багытталган жаңы санариптик куралдар жана аларды андан ары өнүктүрүү пландары жөнүндө маалымат беришти.
Банк секторунун өкүлдөрү учурдагы көйгөйлөрдү жоюу жана өз ара аракеттенүүнү жакшыртуу үчүн конкреттүү чечимдерди сунушташты.
Катышуучулар финансылык жана ишкердик иш жүргүзүү үчүн жагымдуу шарттарды түзүү максатында кызматташууга даяр экендигин билдиришти.
Талкуунун жыйынтыгында тараптар Салык кызматы менен банк секторунун ортосундагы өз ара аракеттенүүнү өркүндөтүү боюнча биргелешкен сунуштарды даярдоону макулдашышты, бул салык төлөөчүлөрдү тейлөөнүн сапатын жакшыртууга жана мамлекет менен банктардын ортосундагы өнөктөштүктү бекемдөөгө мүмкүндүк берет.
