Бишкек, 17.09.26. /Кабар/. Ош шаарында 2026-жылы курулган жана оңдолгон жолдордун сапатына текшерүү жүргүзүлүүдө. Бул тууралуу Курулуш министрлиги билдирет.
Текшерүү үчүн атайын комиссия түзүлүп, анын курамына Мамлекеттик архитектура-курулуш контролдоо департаментинин, контролдоо бөлүмүнүн жана Курулушта сертификаттоонун республикалык борборунун адистери кирди. Текшерүүнүн алкагында 2026-жылы асфальтталган жолдордон керн үлгүлөрү алынып, лабораториялык изилдөөгө жөнөтүлүүдө. Ошондой эле жол куруу технологиясы, колдонулган материалдардын сапаты жана аткарылган иштердин курулуш ченемдери менен стандарттарына шайкештиги текшерилүүдө.
“Ош шаардык жолдор” муниципалдык ишканасынын 2026-жылга карата титулдук иш планына ылайык, шаарда 50 км жолду асфальттоо жана 51 км тротуар куруу пландалган. Учурда 16,3 км жол асфальтталып, 17 км тротуар курулду.
Текшерилип жаткан көчөлөр:
- Х. Абдуллаев көчөсү — 600 м;
- Г. Айтиев көчөсү — 1400 м;
- Он-Адыр №111 көчөсү — 714 м, капиталдык оңдоо;
- Баялинов көчөсү — 500 м, капиталдык оңдоо;
- Имам-Ата №101 көчөсү — 1000 м;
- Абакыр уулу Төрөбек көчөсү — 800 м, капиталдык оңдоо;
- Ю. Төлөнов көчөсү — 2640 м, асфальттоо жана эки көпүрө куруу;
- С. Абдувалиев көчөсү — 1160 м;
- Курманжан датка көчөсү — 2000 м.
"Текшерүүнүн жыйынтыгы лабораториялык изилдөөлөрдүн жана жеринде жүргүзүлгөн көзөмөлдүн негизинде чыгарылып, аныкталган кемчиликтер боюнча тиешелүү чаралар көрүлөт",-деп айтылат маалыматта.
