Бишкек, 12.09.26. /Кабар/. Ош облусунда бүгүн, 12-сентябрда президент Садыр Жапаровдун онлайн катышуусунда Ош облусунун аймагында 9 өндүрүш объект пайдаланууга берилди. Бул тууралуу облустагы өкүлчүлүктөн билдиришти.
Маалыматка ылайык, Кара-Суу, Ноокат, Өзгөн, Чоң-Алай, Араван райондорунда кыш жана ташты кайра иштетүүчү заводдор, кен иштетүүчү компания, логистикалык борбор, ошондой эле чакан ГЭС пайдаланууга берилди.
Жаңы өндүрүш ишканаларынын ишке кириши менен аймакта жумуш орундары түзүлөт. Жергиликтүү бюджетке салыктык түшүүлөр көбөйөт. Курулуш материалдарынын жана электр энергиясынын өндүрүшү жогорулайт. Муну менен облустун социалдык-экономикалык өнүгүүсүнө олуттуу салым кошулат.
