Бишкек, 25.07.25. /Кабар/. Бүгүн Мамлекеттик салык кызматынын төрагасы Алмамбет Шыкмаматов Нарын шаарындагы базарларда акциздик маркаларды товарларда колдонуу боюнча талаптардын аткарылышын көзөмөлдөдү.
Ведомстводон маалымдашкандай, рейддик иш-чарага президенттин Иш башкармалыгынын башчысы Каныбек Туманбаев дагы катышты.
Иш-чаранын жүрүшүндө салыктык тартипти бекемдөө жана мыйзамсыз товар жүгүртүүнү аныктоо максатында соода түйүндөрүндө текшерүүлөр жүргүзүлдү.
Алмамбет Шыкмаматов салык мыйзамдарын, өзгөчө акциздик маркаларды колдонуу боюнча талаптарды так сактоо зарылдыгын баса белгиледи.
Текшерүүлөрдүн жыйынтыгында акциздик маркаларга байланышкан салык мыйзамдарынын бузуу факты аныкталды. Мыйзам бузгандарга карата тиешелүү мыйзам чегиндеги чаралар, анын ичинде айып пул салуу колдонулду.
Эске салсак, мындай рейддик иш-чаралар Кыргызстандын аймактарында көмүскө экономикага каршы күрөшүү, мыйзамдуулукту камсыз кылуу жана салыктык тартипти чыңдоо максатында үзгүлтүксүз жүргүзүлүп келет.
