Бишкек, 13.02.26. /Кабар/. Кыргызстан менен Тажикстандын соода үйлөрүн ачуу зарыл. Мындай сунуш “Ынтымак Ордодо” өткөн Кыргыз-тажик өкмөттөр аралык кеңешинин биринчи отурумунда айтылды.
Министрлер кабинетинин төрагасы Адылбек Касымалиев белгилегендей, Кыргызстан эт-сүт азыктарын, тигүү-текстиль буюмдарын, көмүр, айнек буюмдарын, анын ичинде курулуш жана атайын айнектерди, ошондой эле кантты жеткирүүнү көбөйтүүгө даяр.
Ошондой эле жыйында эки мамлекеттин башчыларынын өлкөлөр ортосундагы товар жүгүртүүнү көбөйтүү боюнча тапшырмасын аткаруу максатында конкреттүү чараларды камтыган "жол картасын" иштеп чыгуу жана ага кол коюу сунушталды.
Мындан тышкары, кыргыз тарап продукцияны илгерилетүүнүн, ишкерлер ортосунда түз байланыштарды жана туруктуу өткөрүү каналдарын түзүүнүн натыйжалуу механизми катары Кыргызстандын Тажикстандагы жана Тажикстандын Кыргызстандагы соода үйлөрүн ачуу маселесин кароону сунуштады.
