Бишкек, 21.11.26 /Кабар/. Быйылкы жылдын 10 айында Кыргызстандын Өзгөчө кырдаалдар министрлигине жарандардан жалпы 2 млн 795 миң 161 кайрылуу түштү. Бул тууралуу ведомстводон маалымдашты.
Маалыматка ылайык, ушул мезгил аралыгында ӨКМдин куткаруучулары 428 адамдын өмүрүн сактап калышты.
Алардын ичинде:
- жол кырсыгынан жабыркаган 113 адам;
- сууга чөгүп бара жаткан 14 адам;
- тоодогу кырсыктардан жабыркаган 4 адам;
- өрттөн 5 адам бар.
Мындан тышкары, медицина кызматкерлери келгенге чейин 731 жаранга биринчи жардам көрсөтүлгөн.
Ошондой эле министрликтин 10 айда аткарган негизги иштери белгиленди:
- Суу объектилерин тазалоо: Ысык-Көлдүн, Соң-Көлдүн жана Токтогул суу сактагычынын түбү тазаланып, 202 гектарга жакын аянттан 25 тонна таштанды жана 156 чакырымдан ашык балык уулоочу тор чыгарылды.
- Сел жана суу ташкындарынан коргоо: Мурун курулган дамбалар, бекемделген арыктар жана каналдар 72 тилкеде өз натыйжасын берип, миңдеген жарандардын үйүн, мүлкүн жана жолдорун зыяндан сактап калды.
- Көпүрөлөрдүн курулушу: Ак-Суу жана Түп райондорундагы Сары-Жаз дарыясына салынган көпүрөлөрдүн курулушу аяктап, 90го жакын чабандын жайлоого коопсуз өтүүсүнө жана 180 миң гектардан ашык жайытты өздөштүрүүгө шарт түзүлдү.
- Уулуу калдыктарды зыянсыздандыруу: Өлкөдөгү 60 кооптуу объекттин 34үндө тазалоо иштери жүрүп, 25 объекттеги иштер толук аяктады.
Мындан тышкары, жыл башынан бери калкка 69 жолу шашылыш эскертүү берилген.