Бишкек, 04.03.25. /Кабар/. “Мамлекеттик ипотекалык компания” ААК башкармалыгынын төрагасынын орун басары Тилек Жээмбаев ипотекалык программанын алкагында үлүштүк курулуш шарттарында турак жай куруунун баасы чарчы метри 700 доллардан 1 миң 400 долларга чейин болуп жатканын билдирди.
Анын айтымында, эң кымбат батирлер Бишкектеги “Ынтымак” турак жай комплексинде жайгашкан, анда 8 миң батир курулуп жатат.
“Анын ичинен 4 миң батир ипотекага кезекте турган жарандар үчүн курулууда. Алар үчүн бир чарчы метрдин баасы 650 долларды түзөт. Ал эми үлүштүк курулуш аркылуу турак жай алгандар үчүн баасы 1400 доллардан башталат”, - деди ал.
Ошондой эле Жээмбаев белгилегендей, жарандарга ар кайсы даректер боюнча батирлер сунушталып жатат, ар бир объекттин өзүнүн тиешелүү баасы бар.
“Биздин батирлер башка курулуш компанияларына салыштырмалуу арзан”, - деп кошумчалады ал.
