Бишкек, 26.01.26. /Кабар/. Кыргызстандын ички дүң продукциясынын (ИДП) өсүү темпи боюнча аймактык жана дүйнөлүк масштабда жогорку көрсөткүчкө ээ. Бул тууралуу министрлер кабинетинин төрагасы Адылбек Касымалиев минкабдын жыйынында билдирди.
Адылбек Касымалиевдин айтымында, 2025-жылы экономиканын өсүү темпи жогорку деңгээлде сакталып, акыркы эки жылда (2024–2025-жылдары) 11%дан ашты.
“Бул жүргүзүлүп жаткан экономикалык саясаттын натыйжалуулугун жана өнүгүүнүн туура багытта кетип жаткандыгын көрсөтөт. 2025-жылдын жыйынтыгы боюнча ИДПнын көлөмү 1 трлн 976,4 млрд сомду түздү. Башкача айтканда, дээрлик 2 трлн сомго жетти жана жылдын аягына карата такталган эсептөөлөр боюнча 2 трлн сомдон ашат деп күтүлүүдө. Салыштыруу үчүн, 2022-жылы ИДПнын көлөмү 1 трлн 21 млрд сомду түзгөн. Үч жылдын ичинде ИДПнын көлөмү эки эсеге өстү. 2025-жылы ИДПнын реалдуу өсүү темпи 11,1 %ды түздү. Ошентип, акыркы төрт жылда ИДПнын реалдуу өсүүсүнүн орточо жылдык темпи 10,2 %га жетти, бул аймактык жана дүйнөлүк масштабда абдан жогорку көрсөткүч болуп саналат”, - деди ал.
Адылбек Касымалиев белгилегендей, экономиканын өсүшүнө экономиканын бардык тармактары салым кошту.
Курулуш сектору 21,1 %га, тейлөө сектору – 10,9 %га, айыл чарбасы — 2,2 %га өстү. Өнөр жайда өсүү 10,7 %ды түздү, ал эми өнөр жай продукциясынын көлөмү дээрлик 800 млрд сомго жетти. Өзгөчө жогорку өсүү темптери фармацевтика тармагында – 1,7 эсе, тамак-аш азыктарын өндүрүүдө – 30,1%, резина жана пластмасса буюмдарын, ошондой эле курулуш материалдарын өндүрүүдө – 35,7%, автомобиль өндүрүүдө – дээрлик 2 эсе, химиялык продукцияны өндүрүүдө – 19,8%, ошондой эле пайдалуу кендерди казып алууда – 14,2% катталды.
“Негизги капиталга инвестициялардын көлөмү 18,4%га көбөйүп, 374,6 млрд сомду түздү, бул рекорддук көрсөткүч болуп калды жана 2024-жылга салыштырмалуу 100 млрд сомго көп. Негизги капиталга салынган инвестициялардын 24% же 90,3 млрд сому республикалык бюджеттин эсебинен каржыланды, бул 2024-жылга салыштырмалуу 42,7%га көп”, – деди минкаб башчысы.
