Бишкек, 26.12.25. /Кабар/. IV Элдик курултайда Бишкектен келген делегат Гаарба Орозматов Конституциялык сотко кайрылып, мурда кабыл алынган чечимди кайра карап чыгууну жана коррупционерлерге, педофилдерге, ошондой эле аялдар менен балдарды өлтүргөндөргө карата өлүм жазасын кайтаруу мүмкүнчүлүгүн карап чыгууну суранды.
Ошону менен бирге, ал мындай чечимдер компетенттүү органдар тарабынан жүз пайыздык жана ар тараптуу текшерүүдөн өткөндөн кийин гана кабыл алынышы керектигин баса белгиледи.
"Бул адилетсиздикти жана ката өкүмдөрдү болтурбоо үчүн зарыл", — деди делегат.
Мындан тышкары, Гаарба Орозматов борбор калаанын төрт районунун атын өзгөртүү маселесин козгоду. Анын пикиринде, бул жараян эчак эле бышып жетилген жана ал шаар тургундарынын пикирин эске алуу менен ишке ашырылышы керек.
«Райондордун атын кантип өзгөртүүнү жашоочулар өздөрү чечиши керек», — деп белгиледи ал.
Ошондой эле делегат Кыргызстан Жазуучулар союзунун мүчөлөрү үчүн өзүнчө үй куруу мүмкүнчүлүгүн карап чыгууну сунуштады. Анын айтымында, уюмда 800гө чейин адам бар, бирок алардын дагы деле өзүнчө имараты жок.
Сөзүнүн аягында Орозматов Бишкектин Биринчи май районундагы конуштарда канализациянын жоктугу көйгөйүн көтөрүп, борбор калаанын базалык инфраструктурасын өнүктүрүүгө өзгөчө көңүл бурууга чакырды.
