Бишкек, 22.09.26. /Кабар/. Агартуу министри Догдуркүл Кендирбаева БУУнун Кыргызстандагы туруктуу координатору Антье Граве менен жолукту.
Ведомстводон маалымдашкандай, жолугушууда Антье Гравенин Кыргызстандагы төрт жылдык миссиясынын жыйынтыктары чыгарылып, билим берүү тармагындагы мындан аркы кызматташтыктын багыттары талкууланды.
Догдуркүл Кендирбаева билим берүү системасын трансформациялоо, окуу мазмунун жаңылоо, санариптик чечимдерди киргизүү жана заманбап билим берүү чөйрөсүн түзүү боюнча жүргүзүлүп жаткан иштер тууралуу маалымат берди. Ошондой эле коопсуз билим берүү чөйрөсүн камсыздоо, буллингдин жана зомбулуктун алдын алуу, мектеп психологдору менен социалдык педагогдорду колдоо маселелерине көңүл бурулду.
Антье Граве Кыргызстандагы оң өзгөрүүлөрдү белгилеп, адамдык капиталды өнүктүрүүгө инвестиция салуунун жана 12 жылдык билим берүү моделине өтүүнү ийгиликтүү ишке ашыруунун маанилүүлүгүн белгиледи.
Жолугушуунун соңунда министр Антье Гравеге билим берүү тармагын өнүктүрүүгө кошкон салымы үчүн Агартуу министрлигинин Ардак грамотасын тапшырды.
