Бишкек, 02.11.26. /Кабар/. 5-ноябрда Бишкекте "Борбор Азиядагы өнөр жай трансформациясы жана инвестицияларды мобилизациялоо" аттуу аймактык форум өтөт.
Экономика жана коммерция министрлигинен билдиришкендей, иш-чара министрлер кабинети жана БУУнун Өнөр жайды өнүктүрүү уюму (ЮНИДО) тарабынан уюштурулууда.
Форумдун максаты — өлкөнүн артыкчылыктуу өнөр жай долбоорлорун жана инвестициялык мүмкүнчүлүктөрүн тааныштыруу, ошондой эле мамлекеттик органдар, эл аралык финансы институттары, бизнес өкүлдөрү жана инвесторлор ортосунда кызматташтыкты өнүктүрүү.
Катышуучулар агроазык-түлүк паркын түзүү, санариптик билим берүү, чакан гидроэнергетика, фармацевтика, текстиль жана тигүү өнөр жайын өнүктүрүү маселелерин талкуулашат.
Мындан тышкары, Борбор Азия өлкөлөрүнүн таза технологиялар жана электр унаалары үчүн инфраструктура жаатындагы кызматташтыгы боюнча тажрыйба алмашуу болот.
Форумга Кыргызстандын жана аймактагы өлкөлөрдүн өкмөт өкүлдөрү, ЮНИДО, БУУ, эл аралык финансы институттары, бизнес-коомчулук жана потенциалдуу инвесторлор катышат. Иш-чаранын жыйынтыгы боюнча кийинки кадамдар аныкталып, жыйынтыктоочу документ кабыл алынат.
