Бишкек, 14.01.26. /Кабар/. Бишкектеги жаңы батыш автобекетинин, "Ош" базарынын жана Орок айылындагы эл аралык класстагы “Бишкек Арена” стадионунун курулушу борбордогу көп көйгөйдү жөнгө салат. Бул тууралуу КР эмгек сиңирген архитектору Төлөбай Кеңешов “Биринчи радионун” түз эфиринде билдирди.
Анын айтымында, буга чейин шаардын ичинде жайгашкан автобекет менен "Ош" базары Бишкекте көптөгөн көйгөйлүү маселелерди жараткан.
“Ош" базарынын тегерегинде эл топтолуп, башаламан соода болуп келген. Эми бул базардын шаардын борборунан башка жакка көчүрүлүшү жол тыгынын азайтууга өбөлгө болот. Экинчиден, акыркы жылдары аймактарга кетүүчү жүргүнчүлөрдүн көйгөйү чечилбей, топтолуп келген. Жаңы батыш автобекетинин курулушу да унаа тыгынын азайтуу үчүн стратегиялык мааниге ээ”,- деди Кеңешов.
Эске салсак, күн мурун министрлер кабинетинин төрагасы Адылбек Касымалиев Бишкек шаарындагы аталган курулуш объекттерин көрүп чыкты. Мында минкаб төрагасына жалпы узундугу 8,74 чакырымды түзгөн жол тилкелерин куруу долбоору да сунушталды.
