Бишкек, 22.01.26. /Кабар/. Жогорку Кеңештин депутаты Бурун Аманова парламент жыйынында Бишкектин жаңы конуштарын газдаштыруу маселесин көтөрдү.
Ал белгилегендей, “Газпром” ЖКЧКсы конуштардын жарымын гана газдаштырды. Ошондой эле эл өкүлү ага Баткен облусунун Кадамжай районунун тургундары газ берүү токтоп калганын айтып кайрылышканын кошумчалады.
Өз кезегинде Жогорку Кеңештин төрагасы Нурланбек Тургунбек уулу билдиргендей, Баткенде газ берүү иштери менен “Газпром” компаниясы эмес, “Кыргызнефтегаз” алектенет.
"Ыш маселеси боюнча айта кетсем, акыркы жылдарды алсак, быйыл биринчи жолу Бишкек жашыл аймакка кирди. Муну баарыбыз көрүп жатабыз. Бийлик бул маселе боюнча иштеп жатат. Шаар жетекчилиги ар кандай ыкмаларды колдонуп, абаны тазалоо үчүн иштеп жатышат. Бул үчүн аларга ыраазычылык билдиришибиз керек. Биз жакшы жагында да айтууну үйрөнүшүбүз керек. Ыш көйгөйү толугу менен чечилди деп айта албайбыз, бирок мурунку жылдарга салыштырмалуу абанын булганышы азайды", - деди төрага.
