Бишкек, 07.02.25. /Кабар/. Бишкекте Кыргызстандын салык системасынын жана салык салуунун актуалдуу маселелери боюнча бизнес-жыйын болуп өттү. Бул тууралуу Салык кызматы билдирет.
Ведомствонун маалыматына ылайык, иш-чарага Салык кызматынын, Экономика жана коммерция министрлигинин башкармалыктарынын жана бөлүмдөрүнүн жетекчилери, Түркиянын Кыргызстандагы элчиси Ахмет Садык Доган, ТУКИД бизнес-ассоциациясынын өкүлдөрү, ошондой эле ата мекендик жана чет өлкөлүк ишкерлер жана инвесторлор катышты.
Жолугушуунун темасы — "Кыргызстандын салык системасы, саясаты жана практикасы" болду. Иш-чаранын алкагында Салык кызматынын өкүлдөрү республикадагы салык салуу, бизнес үчүн берилүүчү салыктык жеңилдиктер, алдыдагы салык мыйзамдарындагы өзгөртүүлөр, салык жол-жоболорун жана эсеп системаларын жөнөкөйлөтүү, анын ичинде электрондук эсеп-фактураны, электрондук товардык-транспорттук коштомо кагазды жана контролдук-кассалык машинаны колдонуу жөнүндө кеңири айтып беришти.
Салыктык башкарууну өркүндөтүүгө жана өлкөдөгү бизнес чөйрөсүн жакшыртууга багытталган санариптик куралдарды киргизүүгө өзгөчө көңүл бурулду.
Мындан сырткары, отурумдун катышуучулары өздөрүн кызыктырган суроолорду берип, пикир алмашууга жана Кыргызстандын салык системасын жакшыртуу боюнча идеяларды сунуштоого мүмкүнчүлүк алышты.
Белгилей кетсек, мындай жолугушуулар салык саясатын өркүндөтүү жана өлкөдө бизнес жүргүзүү үчүн жагымдуу шарттарды түзүү үчүн бизнес-коомчулук менен мамлекеттик органдардын ортосундагы мамилени бекемдөөгө багытталган.
