Бишкек, 13.02.25. /Кабар/. Ага Хан фонду “Мектептер 2030” программасынын алкагында республика боюнча 70 мектепке STEM жабдууларын өткөрүп берди.
Билим берүү жана илим министрлигинен билдиришкендей, иш-чара бүгүн Бишкектеги Улуттук инновациялык технологиялар мектеп-лицейинде өттү.
STEM материалдары математика, биология, химия, физика предметтери боюнча изилдөөлөрдү жана эксперименттерди жүргүзүү үчүн микроскоп, колба, штатив ж.б. куралдардын жыйындысын камтыйт жана окуучулардын билим билгичтиктерин, дүйнө таанымын өнүктүрүүгө жана мектептин дизайн командалары иштеп чыккан инновациялык чечимдерди ишке ашырууга мыкты жардам берет. Бул демилге 12 жылдык билим берүү системасын ишке ашырууга көмөк көрсөтөт жана заманбап талаптарга ылайык окуучулардын билим деңгээлин жогорулатууга зор салымын кошот.
Аталган программа Чүй, Баткен, Нарын, Ош облустарында жана Бишкек шаарында иштейт жана 70 мектепти жана 30 бала бакчаны камтыйт.
Маалымат үчүн: “Мектептер 2030” программасы – Афганистан, Бразилия, Кения, Кыргызстан, Пакистан, Португалия, Тажикстан, Танзания жана Уганда мамлекеттеринде билим берүүнүн сапатын жогорулатууга жана жыйынтыктарды изилдөөгө багытталган 1000 мамлекеттик мектепке чейинки, башталгыч жана жалпы билим берүү мекемелери менен иш алып барган 10 жылдык программа.
Программа балдардын жана жаштардын билимин, көндүмдөрүн, дүйнө таанымын, баалуулуктарын калыптандырууда жана алардын коомдун өнүгүшүнө андан ары толук кандуу катышуусу үчүн мыкты тажрыйбаларды жана чечимдерди аныктоо жана жайылтуу үчүн техникалык тажрыйбасы менен финансылык ресурсун бириктирген тогуз филантроптук өнөктөштүн консорциуму тарабынан колдоого алынган.
