Бишкек, 16.09.26. /Кабар/. Баткен облусунун Сүлүктү шаарында облус жетекчиси Мамыржан Рахимовдун жетекчилиги менен облус аймагындагы актуалдуу маселелерди талкуулаган жыйын өттү.
Өкүлчүлүктөн билдиришкендей, анда үч негизги маселе каралды. Алардын ичинде Баткен облусунун 2026–2027-жылдардагы күз-кыш мезгилине даярдыгы, эл менен жолугушууларда айтылган сын-сунуштардын аткарылышы жана турак жайларды камсыздандыруу маселеси болду.
Алгач күз-кыш мезгилине даярдык маселесинин алкагында калкты көмүр менен үзгүлтүксүз камсыздоо боюнча жүргүзүлүп жаткан иштер каралды. Облус башчысы жетекчилерге көмүр казуучу ишканалар менен калкты көмүр менен камсыздоо боюнча келишимдерди тез арада түзүп, жеткирүүнүн так графигин иштеп чыгууну тапшырды.
Ошондой эле көмүр өндүрүүчү ишканалар тарабынан ноябрь айына чейин бекитилген графиктин негизинде ички рынокту көмүр менен камсыз кылуу, андан кийин экспорт маселесин кароо боюнча сунуш айтылды.
Жыйында Монополияга каршы жөнгө салуу кызматынын өкүлү көмүрдүн белгиленген баалары жана калк үчүн көмүрдүн жеткиликтүүлүгүн камсыз кылуу боюнча маалымат берди. Маалыматка ылайык, көмүрдүн БР түрү облус аймагында 6 700 сомдон 9 200 сомго чейин сатылууга тийиш.
Жыйында турак жайларды, унаа каражаттарын жана ишканаларды камсыздандыруу маселеси да каралды. Облус жетекчиси камсыздандыруу деңгээлин 70 пайызга жеткирүү керектигин белгиледи.
Облус жетекчиси калк тарабынан көтөрүлгөн маселелерди жеринде чечүүгө мүмкүнчүлүк болсо, аларды создуктурбай чечип, жарандар менен тыгыз иш алып баруу зарылдыгын белгиледи. Тиешелүү жетекчилерге берилген тапшырмаларды өз мөөнөтүндө жана сапаттуу аткаруу, ошондой эле эл менен түз байланышта иш алып баруу боюнча бир катар милдеттер коюлду.
