Бишкек, 31.07.26 /Кабар/. Чолпон-Ата шаарындагы мамлекеттик резиденцияда Борбор Азия жана Азербайжан мамлекет башчыларынын бейформал консультативдик жолугушуусу өтүүдө.
Жолугушууга Кыргызстандын президенти Садыр Жапаров, Азербайжандын президенти Илхам Алиев, Казакстандын президенти Касым-Жомарт Токаев, Тажикстандын президенти Эмомали Рахмон, Түркмөнстандын президенти Сердар Бердымухамедов жана Өзбекстандын президенти Шавкат Мирзиёев катышууда.
Бул форматтагы жолугушуулар аймактык кызматташтыкты өнүктүрүү, мамлекет башчыларынын ортосундагы түз диалогду камсыз кылуу жана биргелешкен чечимдерди иштеп чыгуу үчүн маанилүү аянтча болуп саналат.
2025-жылы Ташкент шаарында өткөн Борбор Азия мамлекет башчыларынын VII консультативдик жолугушуусунда Азербайжан бул форматка толук кандуу катышуучу катары кабыл алынган. Бул чечим Борбор Азия менен Түштүк Кавказдын ортосундагы кызматташтыкты кеңейтүүгө багытталган маанилүү кадам катары бааланган.
Жаңы кеңейтилген формат өлкөлөрдүн соода-экономикалык, инвестициялык, транспорттук жана гуманитардык байланыштарын өнүктүрүү үчүн кошумча мүмкүнчүлүктөрдү түзөт.
Азербайжандын бул форматка кошулуусу Борбор Азия менен Түштүк Кавказдын ортосундагы байланыштарды чыңдоого, анын ичинде транспорттук каттамдарды жана экономикалык кызматташтыкты өнүктүрүүгө жаңы мүмкүнчүлүктөрдү ачат.
Мындан тышкары, тараптар аймактагы туруктуулукту, өз ара ишенимди жана узак мөөнөттүү өнөктөштүктү бекемдөө багытындагы аракеттерди улантууга кызыкдар экенин билдиришүүдө.
