Бишкек, 26.02.26. /Кабар/. Ысык-Көл облусунун Ак-Суу районунда үрөй учурган окуя катталды. Өспүрүм кызынын кош бойлуу экенин уккан аял өзүн өрттөп, алган жаракаттарынан улам ооруканада каза болду. Бул тууралуу облустук милициядан билдиришти.
Маалыматка ылайык, 25-февралда милицияга Ак-Суу айылынын 2009-жылы туулган тургуну (16 жашта) кош бойлуу экени тууралуу маалымат түшкөн. Бул факт боюнча тергөөгө чейинки териштирүү иштери башталып, өспүрүм кыз суракка алынган.
"Кызды суракка алуу учурунда анын апасы — 1985-жылы туулган М.А. — психологиялык абалына байланыштуу мыйзамдуу өкүл катары катышуудан баш тарткан. Мындан улам сурак Ак-Суу райондук үй-бүлөнү жана балдарды коргоо башкармалыгынын кызматкеринин катышуусунда катышуусунда өткөн", — деп айтылат маалыматта.
Ошол эле күнү саат 21:00 чамасында М.А. үйүнөн чыгып кетип, өзүнө бензин куюп өрттөгөн. Ал Ысык-Көл облустук ооруканасына жеткирилгени менен, алган жаракаттарынан улам көз жумган.
Учурда соттук-медициналык экспертиза дайындалып, Ак-Суу РИИБ тарабынан тергөө иштери жүргүзүлүүдө.
