Бишкек, 29.01.25. /Кабар/. Министрлер кабинетинин төрагасынын орун басары – УКМКнын төрагасы Камчыбек Ташиев Шанхай Кызматташтык Уюмунун Аймактык антитеррордук түзүмүнүн Аткаруу комитетинин директору Уларбек Шаршеев менен кеңешме өткөрдү.
Атайын кызматтан билдиришкендей, Камчыбек Ташиев аймактык жана стратегиялык жактан маанилүү 10 мамлекетти бириктирген Шанхай кызматташтык уюмунун антитеррордук түзүмү мамлекеттер аралык коопсуздукту камсыз кылууда маанилүү роль ойноорун белгиледи.
"Баарыбыздын милдетибиз бир - аймактар аралык коопсуздукту камсыз кылуу. ШКУнун антитеррордук түзүмү мамлекеттер ортосундагы кызматташтыкты чыңдоодо маанилүү роль ойнойт", - деп белгиледи Камчыбек Ташиев.
Өз кезегинде Уларбек Шаршеев алдыдагы биргелешкен машыгуулар жана ШКУнун алкагында өтүүчү бир катар иш-чаралар тууралуу маалымат берди, бул өлкөлөр ортосундагы ишенимди жана координацияны бекемдөөгө жардам берет.
