Бишкек, 30.01.25. /Кабар/. Бүгүн Кыргызстанда кесиптик билим берүүнү өнүктүрүүдөгү маанилүү кадам болгон WorldSkills Kyrgyzstan-2025 экинчи улуттук чемпионатынын расмий ачылышы болду.
Билим берүү жана илим министрлигинен маалымдашкандай, иш-чара эл аралык WORLDSKILLS кыймылынын алкагында өтүүдө.
Чемпионаттын ачылышына билим берүү министринин орун басары Расул Абазбек уулу, Жогорку Кеңештин депутаты Жанар Акаев, эмгек министринин биринчи орун басары Мухтарбек Баймурзаев, экономика министринин орун басары Чоро Сейитов жана WORLDSKILLS коомдук фондунун негиздөөчүсү Куван Жусуев катышты.
Экинчи улуттук чемпионат 18 жаштан 22 жашка чейинки курактагы жаш адистерге жана студенттерге үч негизги багыт: "ширетүү технологиясы"," ашпозчулук" жана "мода технологиясы" боюнча кесиптик чеберчилигин көрсөтүүгө уникалдуу мүмкүнчүлүк берет.
Кыргызстан 2023-жылы WorldSkills International улуттук чемпионатынын мүчөсү болгон, ал эми 2024-жылы Францияда өткөн эл аралык мелдештерде биринчи улуттук чемпионаттын жеңүүчүлөрү өлкөнүн атын чыгарышкан. Мындай иш-чараларга катышуу тажрыйба алмашууга жана өлкөдөгү кесиптик билим берүүнүн деңгээлин жогорулатууга жардам берет.
WorldSkills International 89 өлкөнү бириктирип, IT, курулуш, ашпозчулук жана моданы камтыган 60тан ашуун адистиктер боюнча чемпионаттарды өткөрөт.
Чемпионатты Билим берүү министрлиги WorldSkills коомдук фонду менен биргеликте уюштурду.
