Бишкек, 07.04.26 /Кабар/. Сокулук районунун Сары-Өзөн айыл аймагында жайгашкан Туюк чакан ГЭСинин курулуш иштери бекитилген графикке ылайык толугу менен аяктады. Бул тууралуу Сокулук райондук мамлекеттик администрациясы билдирди.
Маалыматка ылайык, учурда объектте акыркы даярдоо жана техникалык текшерүү иштери жүргүзүлүүдө. Аны расмий түрдө ишке берүү жана электр энергиясын өндүрүп баштоо апрель айына пландалууда.
“Аталган долбоорду ишке ашыруу аймактын энергетикалык потенциалын жогорулатууга жана электр энергиясына болгон керектөөнү камсыздоого багытталган. Курулуш процессинде заманбап технологиялар колдонулуп, бардык техникалык жана экологиялык талаптар сакталды”,-деп айтылат маалыматта.
