Бишкек, 08.10.26 /Кабар/. Токой кызматына жаңы техника жана жабдуулар берилди.
Жаратылыш ресурстары министрлигинин маалыматына караганда, Токой кызматына принтери менен кошо 55 комплект компьютердик техника, 559 планшет жана дрондор сатып алынган.
Компьютердик техника иш процесстерин жакшыртууга, иш кагаздарын жүргүзүүнү тездетүүгө, электрондук отчеттуулукту кеңейтүүгө жана кызматтык маалыматтарды ыкчам иштетүүгө мүмкүндүк берет.
Планшеттер жана дрондор түздөн-түз талаа шартында, анын ичинде тоолуу жана жетүүгө кыйын токой аймактарында иштеген кызматкерлерге берилет. GPS-навигация жана геолокация функциялары, ошондой эле атайын тиркемелер менен жабдылган мобилдик түзмөктөрдүн жардамы менен токой фондунун абалын ыкчам көзөмөлдөп, мыйзамсыз бак кыюу фактыларын, токой өрттөрүн, браконьерликти жана башка мыйзам бузууларды аныктоого болот. Ошондой эле маалыматтарды тиешелүү бөлүмдөргө өз убагында жөнөтүүгө шарт түзүлөт.
Мындан тышкары, Токой кызматына JAC үлгүсүндөгү унаалар, экскаватор жана JAC T9 пикабы берилди.
Бул техника тоолуу жана жетүүгө кыйын аймактарда рейддерди өткөрүүдө, токой кайтаруу кызматкерлерин ыкчам жеткирүүдө, ошондой эле өрт өчүрүүчү жабдууларды, көчөттөрдү жана башка керектүү каражаттарды ташууда колдонулат.
