Бишкек, 28.05.26. /Кабар/. Кыргызстандын Соода-өнөр жай палатасына аймактардан 40тан ашык бизнес өкүлдөрү кошулду.
Палатадан билдиришкендей, тигүү жана курулуш өнөр жайы, өндүрүш, соода, тейлөө, логистика тармагында иштеген компаниялар жана ишкерлер, ошондой эле түрдүү ведомстволордун жана чыгармачыл бизнестин өкүлдөрү кошулду.
"Мүчөлүк базанын кеңейиши бизнести өнүктүрүүнүн, ата мекендик продукцияны илгерилетүүнүн жана эл аралык байланыштарды кеңейтүүнүн эффективдүү аянтчасы катары бизнес-коомчулуктун палатага болгон ишениминин жогорулашынын айкын көрсөткүчү",-деп айтылат маалыматта.
Бүгүнкү күндө Соода-өнөр жай палатасы экономиканын түрдүү тармактарындагы ишканаларды бириктирип, аймактык ишкердикти өнүктүрүүгө, кичи жана орто бизнести колдоого, өнөктөштөрдү издөөгө жана кыргыз компанияларын тышкы рынокко жылдырууга активдүү көмөктөшүүдө.
Каалаган бизнес өкүлү, жеке ишкерлер, чакан бизнестен баштап ири компанияларга жана өндүрүш ишканаларына чейин Соода-өнөр жай палатасына мүчө боло алат.
Палатанын жаңы мүчөлөрү ишкердик кызматташуу, эл аралык форумдарга, көргөзмөлөргө, бизнес-миссияларга жана B2B жолугушууларына катышуу үчүн кеңири мүмкүнчүлүктөргө, ошондой эле маалыматтык, эксперттик жана консультациялык колдоолорго ээ болушат.
