Бишкек, 30.10.26. /Кабар/. Мамлекеттик салык кызматынын кызматкерлерине коррупциялык аракеттердин кесепеттери, кызматтык этиканы сактоо жана мыйзам бузууга түрткөн фактылар тууралуу кабарлоо тартиби түшүндүрүлдү.
Ведомстводон билдиришкендей, коррупциянын алдын алуу боюнча окутууга борбордук аппараттын жана аймактык салык органдарынын кызматкерлери катышты. Иш-чара офлайн жана онлайн форматта өтүп, аны коррупциянын алдын алуу боюнча ыйгарым укуктуу өкүл Акылбек Ахматов өткөрдү.
Окутууда салыктык текшерүүлөр, салык төлөөчүлөргө кызмат көрсөтүү, уруксат берүүчү документтерди берүү, мамлекеттик сатып алуулар жана кадр маселелери коррупциялык тобокелдиктер жогору болгон багыттар катары белгиленди.
Ошондой эле кызматкерлерге салыктык сырды сактоо, кызыкчылыктардын кагылышуусуна жол бербөө жана кызматтык чектөөлөрдү сактоо боюнча түшүндүрмөлөр берилди.
Мындан тышкары, мыйзамсыз аракеттерге түрткөн учурлар тууралуу билдирүү тартиби жана мындай маалыматтарды кароо жол-жобосу тааныштырылды. Мыйзам бузууга түрткөн фактылар тууралуу кабар берген кызматкерлерди коргоо боюнча чаралар каралганын Акылбек Ахматов белгиледи.
