Бишкек, 18.03.26. /Кабар/. Мамлекеттик салык кызматынын төрагасы Алмамбет Шыкмаматов Ош облусунда жергиликтүү ишкерлер менен жолугушту.
Ведомстводон маалымдашкандай, жыйын ачык диалог жана суроо-жооп форматында өттү.
Анда ишкерлерге салык мыйзамдарындагы акыркы өзгөртүүлөр жана салыктык башкарууну жөнөкөйлөтүү боюнча маалымат берилди. Ошондой эле ачыктыкты камсыз кылган "Салык күзөт" аналитикалык системасы тааныштырылды.
Төрага мамлекет менен бизнестин ортосунда тең салмактуулук болушу керектигин белгилеп, салыкчыларга ишкерлерге тоскоолдук жаратпастан, ар тараптуу консультациялык көмөк көрсөтүүнү тапшырды.
Ишкерлер өз көйгөйлөрүн түздөн-түз жеткирип, жооп алышты. Шыкмаматов маанилүү чечимдерди кабыл алууда бизнес-коомчулуктун пикири эске алынарын белгиледи.
"Салык системасы бюджетти толтуруу менен бирге салык төлөөчүлөргө ыңгайлуу шарттарды түзүшү керек. Бизнес менен мамлекеттин ортосунда өнөктөштүк мамиле гана натыйжа берет", – деди Алмамбет Шыкмаматов.
Жолугушуунун жыйынтыгында салыктык башкарууну өркүндөтүү жана ишкерлер менен байланышты жакшыртуу боюнча конкреттүү тапшырмалар берилди.
