Бишкек, 07.08.26. /Кабар/. Ош шаарында эне-бала саламаттыгын коргоого багытталган жаңы Перинаталдык борбордун курулушу жүрүп жатат. Бул тууралуу Саламаттык сактоо министрлигинен билдиришти.
Долбоор Саламаттык сактоо министрлиги тарабынан Германиянын өнүктүрүү банкынын (KfW) 13,5 млн евро өлчөмүндөгү гранттык каражатынын эсебинен ишке ашырылууда.
Учурда Ош облустар аралык бириккен клиникалык ооруканасынын аймагындагы курулуш иштеринин даярдыгы 10 пайызды түзөт. Объектте күн сайын 30дан 70ке чейин адис иш алып барууда.
Жаңы борбор 249 орунга ылайыкталып, кош бойлуу аялдарга, төрөттөн өткөн энелерге жана ымыркайларга заманбап медициналык жардам көрсөтүүгө шарт түзөт.
Курулуш иштерин 2028-жылдын IV чейрегинде аяктоо пландалууда. Борбор заманбап медициналык жабдуулар менен камсыздалат.
