Бишкек, 06.03.25. /Кабар/. Ноокат районуна караштуу Борбаш айылында 375 орундуу мектептин курулушу 70 пайызга аяктап калды. Бул тууралуу Курулуш, архитектура жана турак жай-коммуналдык чарба мамлекеттик агенттигинен билдиришти.
Маалыматка ылайык, мектептин курулушу республикалык бюджеттин эсебинен каржыланып жатат, долбоордун тендердик баасы 172 миллион сомду түзөт.
Жалпы аянты 2349 чарчы метр болгон жаңы мектеп 375 окуучуга ылайыкталган. Долбоор заманбап билим берүү инфраструктурасын камтып, төрт блоктон туруп, эки кабаттуу окуу корпус, өтмө галереясы жана спорт залы бар.
Мектепте башкы окуу класстардан тышкары китепкана жана окуу залы, компьютердик класс, лаборатория, балдар жана кыздар үчүн эмгек кабинети, медициналык кабинет жана ашкана каралган. Ал эми спорт залы дене тарбия сабактары үчүн бардык шарттарда камсыздалат.
Бүгүнкү күндө курулуш иштери 70%га аяктап, курулуштун бардык этаптарын бүтүрүү боюнча активдүү иштер жүрүүдө.
