Бишкек, 06.08.26. /Кабар/. Министрлер кабинетинин төрагасынын орун басары – суу ресурстары, айыл чарба жана кайра иштетүү өнөр жайы министри Эрлист Акунбеков "Агро Куш" ЖЧКсынын ишмердүүлүгү менен таанышты.
Ведомстводон маалымдашкандай, ишкана инкубациядан тартып даяр продукцияны чыгарууга чейинки толук өндүрүш циклин жүргүзүп, өлкөнүн ички рыногун ата мекендик тоок эти менен камсыз кылууга багытталган.
Маалыматка ылайык, "Агро Куш" жылына 7 миллиондон ашык бройлер тоогун өстүрүп, 9 миң тоннага жакын тоок этин өндүрөт. Ошондой эле ишканада жылына 28 миң тоннага чейин комбикорм чыгарылып, 600дөн ашык адам туруктуу жумуш менен камсыздалган.
Эрлист Акунбеков мындай ишканалар азык-түлүк коопсуздугун бекемдөөгө, импортту алмаштырууга жана кайра иштетүү өнөр жайын өнүктүрүүгө маанилүү салым кошорун белгиледи.
