Бишкек, 30.01.26. /Кабар/. Өлкөдө ички рынокту туруктуу камсыздоону улантуу жана жарандарга сапаттуу азыктарды жеткиликтүү баада сунуштоо максатында азык-түлүк жарманкелери уюштурулууда. Бул тууралуу Суу ресурстары, айыл чарба жана кайра иштетүү өнөр жайы министрлигинен билдиришти.
Маалыматка ылайык, жарманкеде азык-түлүк товарлары шаар тургундарына базар баасынан төмөн баада сунушталууда.
Жарманке баалардын өсүш темпин басаңдатуу, социалдык аярлуу катмарды жеткиликтүү азык-түлүк менен камсыздоо, ата-мекендик өндүрүүчүлөрдү колдоо жана ички рыноктун туруктуулугун камсыз кылуу максатын көздөйт. Иш-чара июнь айына чейин уюштурулмакчы.
Бишкек шаарында жарманке ар ишемби жана жекшемби күндөрү мэрия менен биргеликте өткөрүлүп жатат.
Жарманкенин өтүү жайы:
- Т. Усубалиев атындагы аянт;
- И. Раззаков жана Абдымомунов көчөлөрүнүн кесилишиндеги аймак;
- Эркиндик бульвары (Биринчи май району).
Катышуучуларда райондук агрардык башкармалыктан алынган тастыктоочу кат болушу талап кылынат.
