Бишкек, 26.05.26. /Кабар/. Ташкент шаарында маданий салттардын жана улуттук тамак-аштардын XXII эл аралык кайрымдуулук фестивалы өттү.
Экономика жана коммерция министрлигинен билдиришкендей, иш-чаранын алкагында Кыргызстандын Өзбекстандагы Соода өкүлчүлүгү улуттук павильонду уюштурду. Ошондой эле "Алайку Органикс", "Абдыш-Ата" жана "Медовая артель" сыяктуу ата мекендик алдыңкы өндүрүүчүлөрдү тартууда жигердүү көмөк көрсөттү.
"Кыргыз бренддеринин продукциялары, улуттук тамак-аштар жана элдик кол өнөрчүлүк буюмдары чет элдик дипломаттардын жана иш-чаранын конокторунун арасында чоң суроо-талапка ээ болду. Фестивалга катышуу Кыргызстандын экспорттук дараметин көрсөтүүгө гана эмес, гуманитардык байланыштарды чыңдоого да өбөлгө түздү", — деп айтылат маалыматта.
Иш-чара кайрымдуулук мүнөзүндө өттү. Сатуудан түшкөн бардык каражаттар онкологиялык оорулардан жабыркаган жана майыптыгы бар балдарга колдоо көрсөтүүгө жана жардам берүүгө багытталат.
