Бишкек, 18.04.25 /Кабар/. Бүгүн Токио шаарында эмгек, социалдык камсыздоо жана миграция министри Равшанбек Сабиров Япониянын коргоо министри жана парламентинин депутаттары менен жолугушту.
Ведомстводон маалымдашкандай, жолугушууда инвестиция, билим берүү, маалыматтык технологиялар, маданий-гуманитардык кызматташуу, энергетика тармагын өнүктүрүү, эмгек миграциясы жана жарандарды социалдык коргоо жана санариптик технологиялар жаатында кесипкөйлөрдү даярдоо маселелери талкууланды.
Мындан тышкары, кыргыз тарап өлкөдө ГЭСтерди куруу жана модернизациялоо боюнча пландар тууралуу маалымдап, гидроэнергетиканы туруктуу өсүштүн артыкчылыктуу багыты катары белгиледи.
Ал эми япон тарап бул тармактагы долбоорлорго инвестициялык жана технологиялык колдоо көрсөтүүгө даяр экенин билдирди.
"Жолугушуунун жыйынтыгында тараптар стратегиялык диалогду бекемдөөгө, туруктуу жана өз ара пайдалуу кызматташтыкты өнүктүрүүгө жана биргелешкен демилгелерди илгерилетүүнү тастыкташты",-деп айтылат маалыматта.
