Бишкек, 27.06.26. /Кабар/. Бишкекте кыргыз-афган бизнес-форуму өтүп, анын алкагында эки өлкөнүн ортосунда Ишкердик кеңеш түзүү жөнүндө келишимге кол коюлду. Бул тууралуу Соода-өнөр жай палатасынан билдиришти.
Афганистандын Соода жана инвестиция палатасынын төрагасы Сайед Мохаммад Карим Хашеми жетектеген делегация менен болгон жолугушууга ата мекендик бизнестин 100гө жакын өкүлү жана мамлекеттик органдардын жетекчилери катышты.
Кыргызстандын Соода-өнөр жай палатасынын президенти Темир Сариев тарыхый коңшулук мамилелерди жаңы экономикалык мазмун менен толуктоо зарылдыгын белгиледи.
Маалыматка ылайык, акыркы жылдары эки тараптуу соодада оң динамика байкалууда. Алсак, 2024-жылы Кыргызстандын Афганистанга экспорту рекорддук көрсөткүчкө жетип, 50,4 млн доллардан ашкан. Ал эми 2025-жылы бул көрсөткүч 29,2 млн долларды түзгөн.
“Форумдун жүрүшүндө оогандык ишкерлер соода, айыл чарба, курулуш жана логистика тармагындагы биргелешкен долбоорлорго өзгөчө кызыгуусун билдиришти. Түзүлгөн Ишкердик кеңеш мындан ары бизнес өкүлдөрүнүн түз диалогу, бизнес-миссияларды уюштуруу жана ири экономикалык долбоорлорду илгерилетүү үчүн туруктуу платформа болуп кызмат кылмакчы”,– деп айтылат маалыматта.
