Бишкек, 07.07.26. /Кабар/. Индиянын бизнес чөйрөсү Кыргызстанда өз өкүлчүлүктөрүн ачууга жана биргелешкен долбоорлорду ишке ашырууга чоң кызыгуу көрсөтүүдө. Бул тууралуу Соода-өнөр жай палатасынан билдиришти.
Маалыматка ылайык, Соода-өнөр жай палатасынын Индиядагы өкүлү Бектурган Калыбек уулу Индиянын экспорттук уюмдар федерациясы (FIEO) тарабынан уюштурулган ири эл аралык иш-чарага катышты.
Ал Гуджарат жана Махараштра штаттарына болгон сапарынын алкагында индиялык ишкерлер, тармактык ассоциациялар жана мамлекеттик органдардын өкүлдөрү менен бир катар сүйлөшүүлөрдү жүргүздү.
Жолугушуулардын жүрүшүндө Кыргызстандын инвестициялык жана экспорттук потенциалы тааныштырылып, индиялык компаниялар түз ишкердик байланыштарды түзүү үчүн өлкөбүзгө келүүгө чакырылды.
"Индия тарапты Кыргызстандагы жагымдуу инвестициялык климат жана өкмөт тарабынан көрсөтүлгөн колдоо чаралары, Кыргызстанды бизнести өнүктүрүү жана коңшу аймактык ири рынокторго чыгуу үчүн ыңгайлуу платформа катары колдонуу келечеги кызыктырууда", - деп айтылат маалыматта.
Сүйлөшүүлөрдүн жыйынтыгында тараптар кыргыз-индия соода-экономикалык жана инвестициялык кызматташтыгын мындан ары да активдүү өнүктүрүүнү макулдашты.
