Бишкек, 26.10.26. /Кабар/. Министрлер кабинетинин төрагасы Адылбек Касымалиев Чүй облусуна болгон иш сапарынын алкагында Токмок шаарындагы "Касиет" камволдук-жип ийрүүчү фабрикасына барды.
Сапардын жүрүшүндө минкаб башчысы ишкананы толук кыдырып, азыркы абалын жеринен көрүп чыкты. Ал аралаштыруу, кардочесалоо, гребнечесалоо, боёо, ровница даярдоо, жип ийрүү, чыйратуу жана түрмөккө ороо, таңгактоо цехтерин кыдырып, Италияда өндүрүлгөн "Савио", "Тематеко", "Меццера" үлгүсүндөгү заманбап жабдуулардын иштеши менен таанышты.
Минкаб башчысына фабриканын учурдагы абалы тууралуу маалымат берилди. Фабрика 1971-жылы негизделип, 1977-жылы ишке кирген. Долбоордук кубаттуулугу жылына 1500 тонна жип болгону менен, учурда болгону 75 тонна өндүрүлүүдө. Ишкана 17,06 га аянтты ээлеп, учурда 450 адам эмгектенет.
Андан соң министрлер кабинетинин төрагасына КР Улуттук инвестициялык фондунун "Жүн кластерин өнүктүрүү стратегиясы: Кичи долбоорлордон чоң долбоорго" долбоору тааныштырылды.
Улуттук инвестициялык фонд тарабынан сунушталган стратегия 3 этаптан турат:
1-этап – Кичи жана орто бизнес. Кийиз жана жип цехтери, гранттар жана жабдуулар. Бул этапта 27 кичи жана орто бизнес долбоору ишке ашырылып, 57,5 млн сом грант жана жеңилдетилген каржылоо берилген. 1000ден ашуун кепилденген сатуусу бар фермерлер тартылып, 100дөн ашуун жергиликтүү жумуш орундары түзүлгөн.
2-этап – ЖАИИ, Токмок шаары. Жүндү алгачкы иштетүү ишканасы. TecNZ (Жаңы Зеландия) линиясында жүндү сорттоо, тытуу, жуу, кургатуу иштери жүргүзүлөт. Долбоордун көрсөткүчтөрү: наркы 728,2 млн сом, 205 жумуш оруну түзүлөт. Кубаттуулугу – жылына 2176 тонна жүн жуу, суунун 95% рециркуляциясы, жылына 98 тонна таза ланолин. Натыйжасы – евро сапаттагы таза чийки зат.
3-этап – "Касиет" ишканасы. Толук өндүрүштүк цикл – топс, камволдук жип, костюмдук жана пальтолук кездемелерди чыгаруу. Кубаттуулугу – жылына 1440 тонна терең кайра иштетүү, кошумча нарк 5-7 эсеге өсөт.
Жалпысынан кластерди ишке ашыруу менен жүндү кайра иштетүүнүн толук өндүрүштүк чынжыры түзүлөт.
Министрлер кабинетинин төрагасы ата мекендик чийки затты терең иштетүү жана кошумча нарк түзүү өлкөнүн индустриализациясы үчүн стратегиялык мааниге ээ экенин белгилеп, тиешелүү мамлекеттик органдарга долбоорлорду өз убагында ишке ашыруу жана "Касиет" фабрикасын толук кубаттуулукта иштетүү боюнча тапшырмаларды берди.
