Бишкек, 18.02.25. /Кабар/. Бүгүн ички иштер министри Улан Ниязбеков баштаган делегация Бириккен Араб Эмираттарынын борбору Абу-Дабиде өтүп жаткан“Айдекс” жана “Навдекс” эл аралык көргөзмөсүнө катышты.
Ведомстводон маалымдашкандай, көргөзмө эл аралык коргоо көргөзмөсү жана конференциясы — жакынкы чыгыштагы эң ири коомдук коопсуздук жана курал-жарак көргөзмөсү болуп саналат жана Абу-Дабиде эки жылда бир өткөрүлүп турат.
Иш сапардын максаты КР ички иштер органдарынын ишиндеги оң тажрыйбаны андан ары интеграциялоо үчүн брондолгон унаалар, дрондор жана башка заманбап коргонуу технологиялары жаатындагы акыркы моделдерди, инновацияларды изилдөө болуп саналат.
Иш-чарада коомдук тартипти бекемдөө, коопсуздукту камсыз кылуу жана жаңы милициянын кызматтык жана күжүрмөн мүмкүнчүлүктөрүн жогорулатуу Кыргызстан үчүн маанилүү милдеттер экендиги белгиленди. Ошондой эле чет мамлекеттердин оң тажрыйбасын изилдөө жана талдоо, аны ички иштер органдарынын ишине андан ары интеграциялоо артыкчылыктуу багыт болуп санала тургандыгы айтылды.
Белгилей кетсек, көргөзмө 21-февралга чейин улантылмакчы.
