Бишкек, 24.02.2026 /Кабар/. Улуттук банктын төрагасынын орун басары Азат Козубеков маалымат жыйынында эсептик чендин өзгөрүшү кредиттик рынокко жана ипотекалык насыяларга кандай таасир этерин түшүндүрүп берди.
Анын айтымында, Кыргызстандын экономикасынын түзүмүнө байланыштуу акча-кредит саясатындагы чечимдер биринчи кезекте аманат (депозит) рыногуна таасир этет. Эсептик чендин өзгөрүшү эң оболу аманаттардын кирешелүүлүгүнөн байкалат.
Депозиттер боюнча чендердин жогорулашы калк жана бизнес үчүн улуттук валютада топтоо жүргүзүү үчүн жагымдуу. Бул сомго болгон суроо-талапты стимулдаштырып, валюта рыногундагы басымды азайтат жана ошону менен инфляцияны ооздуктоого өбөлгө түзөт.
Ошол эле учурда, эсептик чендин кредиттик продуктыларга тийгизген таасири кыйыр түрдө жана белгилүү бир убакыттан кийин байкалат. Козубековдун айтымында, кредиттер боюнча чендерге, анын ичинде ипотекага тийгизген таасири узагыраак мүнөзгө ээ.
Ал белгилегендей, чечим кабыл алууда жөнгө салуучу орган кредиттик жигердүүлүккө жана экономикалык өсүшкө тийиши мүмкүн болгон таасирлерди эске алат.
Улуттук банк инфляция экономикалык жигердүүлүккө, эсептик чендин кредит баасына тийгизген орточо жана убакыт боюнча созулган таасирине караганда алда канча терс таасирин тийгизет деп эсептейт.
Ошентип, акча-кредит саясатынын артыкчылыктуу багыты — кредиттик шарттардын бара-бара өзгөрүшү менен коштолсо дагы, баалардын туруктуулугун камсыз кылуу болуп кала берет.
