Бишкек, 12.02.25. /Кабар/. Чаткал районунун Ак-Таш айылында “Кышкы оюндар фестивалы-2025” иш-чарасы өттү. Бул тууралуу президенттин Жалал-Абад облусундагы өкүлчүлүгүнөн билдиришти.
Маалыматка ылайык, иш-чарага президенттин облустагы өкүлү Тилек Текебаев, район акими Алтынбек Сенирбаев жана жергиликтүү тургундары катышты.
Фестивалдын алкагында элдик кол өнөрчүлүк боюнча көргөзмө жарманкеси уюштурулган.
Облус башчысы Тилек Текебаев мындагы иш-чара Чаткалдын кооз жаратылышын, бай маданиятын жана өнүгүп келе жаткан инфраструктурасын даңазалоо болуп саналаарын белгиледи.
“Биздин максатыбыз—Чаткал районун жыл бою туристтер үчүн жагымдуу аймакка айлантуу. Бүгүнкү кышкы оюндар бул багыттагы негизги кадамдардын бири десем болот.
Чаткал району Жалал-Абад облусундагы кышкы туризмди өнүктүрүү мүмкүнчүлүгү чоң аймактардын бири. Мында кышкы спорттук оюндардын өтүүсү туристтердин агымын арттырып, жергиликтүү тургундардын киреше бөлүгүн көбөйтүп, жаңы жумуш орундарын пайда кылат. Алдыдагы жылдары Чаткал району менен Өзбекстандын борбору - Ташкент шаарын бириктирүүчү 60 чакырым жолдун курулушу менен туристтердин агымы дагы да артаары күтүлөт”,–деди ыйгарым укуктуу өкүл.
Райондун Ак-Таш айылындагы кышкы оюндар фестивалы быйыл экинчи жолу уюштурулду.
