Бишкек, 21.09.26. /Кабар/. Бишкектин четиндеги Кашка-Баш айылында 750 орундуу жаңы мектептин курулушу толугу менен аяктады. Долбоор президент Садыр Жапаровдун тапшырмасынын негизинде Курулуш, архитектура жана турак жай-коммуналдык чарба министрлиги тарабынан ишке ашырылды.
Ведомствонун маалыматына караганда, жалпы аянты 8 миң чарчы метрден ашкан мектептин курулушу 2026-жылдын февраль айында башталган. Учурда имаратта жууп-тазалоо жана эмеректерди орнотуу иштери жүрүп жатат.
Мектептин аймагында эки футбол талаасы, волейбол жана баскетбол аянтчалары, алты тилкелүү чуркоо жолу жана жашыл эс алуу зоналары каралган.
"Бул Кашка-Баш айылында акыркы 30 жылда курулган алгачкы жаңы мектеп. Мектептин ачылышы айылдагы балдар үчүн заманбап жана коопсуз билим алуу шарттарын түзүүгө мүмкүндүк берет", - деп айтылат маалыматта.
