Бишкек, 30.03.26. /Кабар/. Бишкекте кыргыз-беларусь бизнес-форуму өтөт. Бул тууралуу Кыргызстандын Беларустагы элчиси Эрбол Султанбаев билдирди.
Анын айтымында, үстүбүздөгү жылдын июнь айына Бишкек шаарында пландалып жаткан кыргыз-беларусь бизнес-форумуна карата даярдыктар Беларусь соода-өнөр жай палатасынын төрагасы Михаил Мятликов менен талкууланды.
"Бул бизнес-форум Кыргызстан менен Беларустун ишкерлеринин ортосундагы түз байланыштарды тереңдетүү боюнча аракеттердин уландысы болуп эсептелет. 2025-жылдын июнь айында кыргыз-беларусь бизнес-форуму Минск шаарында өткөн", — деп белгиледи элчи.
Ошондой эле Султанбаев белгилегендей, ишкер чөйрөлөрдүн ортосундагы байланыштардын бекемделишин эске алуу менен Кыргызстан менен Беларустун ортосундагы соода жүгүртүү көлөмү акыркы эки жылда дээрлик эки эсеге өстү.
Алсак, 2023-жылы 117,7 млн доллар болсо, 2025-жылы 206,8 млн долларды түздү. Анын ичинде Кыргызстандын экспорту 30%дан ашык өскөн (2023-жылы — 33 млн доллар, 2025-жылы — 44,6 млн доллар).
