Бишкек, 12.12.25. /Кабар/. Кыргызстандын Баткен облусунда Тажикстан менен чектешкен чек ара тилкесинин 80 пайызы зым тосмолор менен тосулду. Бул тууралуу бүгүн министрлер кабинетинин төрагасынын орун басары – УКМКнын төрагасы Камчыбек Ташиевдин Кыргызстан, Өзбекстан жана Тажикстандын чек аралары бириккен аймакта орнотулган стеллага барган учурда белгилүү болду.
Анда чек аранын калган 20 пайызын тосуу иштери бекитилген графикке ылайык улантылып, 2026-жылы толук аяктай турганы маалымдалды.
Атайын кызматтын башчысы чек арадагы учурдагы абал боюнча кеңири маалымат алып, мамлекеттик чек араны тосуу үчун колдонулуп жаткан зым тосмолордун сапатын текшерди.
Ошондой эле Камчыбек Ташиев чек ара инфраструктурасын мындан ары чыңдоо, коопсуздукту жогорулатуу жана курулуш иштеринин темпин ыкчамдатуу боюнча тиешелүү жетекчилерге конкреттүү тапшырмаларды берди. Айрыкча чек ара режимин так сактоо жана алдын алуу чараларын күчөтүү маселелерине өзгөчө көңүл бурулду.
Мындан тышкары, атайын кызматтын төрагасы 2022 аскер бөлүгүнө барып, ал жерде мамлекеттик чек араны бекемдөө боюнча иш-чараларга активдүү катышкан аскер кызматкерлерине акчалай сыйлыктарды тапшырды.
