Бишкек, 06.02.25. /Кабар/. Жиенбеков Бакыт Муратович Мамлекеттик салык кызматынын төрагасынын орун басары болуп дайындалды.
Ведомстводон маалымдашкандай, тиешелүү буйрукка министрлер кабинетинин төрагасы Адылбек Касымалиев кол койду.
Бүгүн Салык кызматынын төрагасы Алмамбет Шыкмаматов төраганын жаңы орун басарын эмгек жамаатына тааныштырды.
Салык кызматынын башчысы жаңы орун басардын салык системасы боюнча терең түшүнүгү бар экенин баса белгилеп, анын билими жана башкаруучулук көндүмдөрү салык чөйрөсүндө белгиленген реформаларды ийгиликтүү ишке ашырууга жардам берерине ишенимин билдирди. Бакыт Жиенбеков салык тармагындагы эмгек жолун 2002-жылы баштаган.
Салык кызматынын төрагасынын жаңы орун басары Бекболот Абдыганыевич Алиевдин ордуна дайындалды, ал ээлеген кызматынан бошотулду.
Алмамбет Шыкмаматов Бекболот Алиевдин жогорку кесипкөйлүгүн жана салык системасына кошкон зор салымын белгиледи.
Салык кызматынын башчысы Бекболот Алиев мындан ары да өзүнүн тажрыйбасын жана билимин өлкөнүн салык тармагын өнүктүрүүдө колдоно берет деген ишенимин билдирди.
