Бишкек, 06.03.26. /Кабар/. Суу ресурстары, айыл чарба жана кайра иштетүү өнөр жайы министри Эрлист Акунбеков Ош облусуна болгон иш сапарынын алкагында Араван районунун Ачы айылындагы "Азиз-Ата" ЖЧКсы тарабынан курулган логистикалык борбордун ишмердүүлүгү менен таанышты.
Министрликтен билдиришкендей, аталган объект 2,42 гектар муниципалдык жер аянтына курулуп, анын жалпы сметалык баасы 21 млн сомду түзөт.
Борбордун сыйымдуулугу 600 тоннаны түзүп, дыйкандар өндүргөн айыл чарба продукцияларын сактоого ылайыкташкан. Учурда мында жергиликтүү дыйкандардын өрүк жана сабиз түшүмү сакталууда. Бул борбор продукцияны узак мөөнөткө сапатын жоготпой сактоого жана рынокко туруктуу жеткирүүгө мүмкүнчүлүк берет.
Мындан тышкары, ишкана Түркия жана башка мамлекеттер менен түзүлгөн келишимдердин негизинде кызматташып, продукцияларды экспортко чыгаруу багытында да жигердүү иш алып барууда.
