Бишкек, 15.10.26. /Кабар/. Бүгүн Ош облусунун Араван районунун Пахта-Абад айылында айылдык маданият үйүнүн базасында уюштурулган Жаштар борбору ачылды.
Президенттин аймактагы өкүлчүлүгүнөн билдиришкендей, иш-чарага облус башчысы Аманкан Кенжебаев, Өзбекстандан келген делегация өкүлдөрү, жергиликтүү бийлик өкүлдөрү, аксакалдар, жаштар жана айыл тургундары катышты.
Иш-чара эки элдин достугун жана ынтымагын бекемдөө максатында уюштурулуп, концерттик программа жана кол өнөрчүлүк көргөзмөсү менен коштолду.
Аманкан Кенжебаев өз сөзүндө жаңы борбор жаштардын бош убактысын натыйжалуу уюштурууга, маданий жана коомдук иш-чараларды өткөрүүгө, чыгармачылык демилгелерин колдоого жана коомдук активдүүлүгүн жогорулатууга чоң шарт түзөрүн белгиледи.
Бул долбоор райондук деңгээлдеги социалдык инфраструктураны өнүктүрүүгө жана жаш муундун ар тараптуу өнүгүүсү үчүн заманбап шарттарды түзүүгө багытталган маанилүү социалдык долбоор болуп саналат.
Объекттин курулушу президенттин Турукташтыруу фондунан каржыланган. Фонддон 35 млн сом бөлүнүп, "Ширин Бизнес Групп" ЖЧКсы тарабынан капиталдык оңдоо иштери толук аяктады.
