Бишкек, 01.07.25. /Кабар/. И.Арабаев атындагы Кыргыз мамлекеттик университетинде кызматтык жасалмачылык фактыларын аныктады. Бул тууралуу Улуттук коопсуздук мамлекеттик комитетинен билдиришти.
Атайын кызматка аталган университетте чет өлкөлүк студенттердин билим алуусуна байланыштуу мыйзам бузуулар тууралуу маалыматтар түшүп, окуу жайга расмий түрдө кабыл алынган чет өлкөлүк студенттер иш жүзүндө өлкөдө жок экендиги жана Кыргызстандан тышкары болуп, окуу процессине катышпаганы аныкталган.
Бул факты боюнча "Кызматтык жасалмачылык" беренеси менен кылмыш иши козголду.
Ыкчам-иликтөө иш-чараларынын алкагында комиссиялык текшерүү жүргүзүлүп, жыйынтыгында чет өлкөлүк 59 студентти окуудан чыгаруу чечими кабыл алынды:
- Өзбекстандын 30 жараны;
- Казакстандын 20 жараны;
- Россиянын 9 жараны.
Азыркы учурда УКМК университеттин окутуучулук жана административдик курамындагы аныкталган тартип бузууларга тиешеси бар адамдарды аныктоо боюнча тергөө-ыкчам иш-чараларды жүргүзүүнү улантууда.
"УКМК билим берүү чөйрөсүндөгү коррупцияга каршы күрөшүү боюнча системалуу иштер улантылып жатканын билдирет жана Кыргыз Республикасынын мыйзамдарына ылайык чара көрүү үчүн жарандарды ушундай фактылар жөнүндө компетенттүү органдарга малымдоого чакырат",-деп айтылат маалыматта.
