Бишкек, 23.02.26. /Кабар/. Күн мурун министрлер кабинетинин төрагасы - суу ресурстары, айыл чарба жана кайра иштетүү өнөр жайы министри Бакыт Төрөбаев Бишкектеги "Тойбосс" эт продукцияларын өндүрүүчү ишкананын ишмердүүлүгү менен жеринен таанышты.
Ведомстводон маалымдашкандай, ал өндүрүш процесси, сапатты көзөмөлдөө системасы жана продукцияны кайра иштетүү мүмкүнчүлүктөрүн көрүп чыкты.
Министр ишкана Кыргызстандагы халал стандарттарына ылайык сертификацияланган эт продукцияларын өндүргөн алдыңкы ишканалардын бири экенин белгиледи.
Ишкананын негизги өндүрүшү Чүй облусунун аймагында жайгашканы менен анын продукциялары өлкө аймагында кеңири таралган, бардык фирмалык соода түйүндөрдө жана супермаркеттерде сунушталууда. Ошондой эле экспортко да чыгарылат. Учурда ишкананын продукциялары төмөнкү эл аралык стандарттарга жооп берет: Halal, ISO 22000:2018, FSSC 22000, HACCP.
Өндүрүштү аймактык деңгээлде өнүгүшү, азык-түлүк коопсуздугун камсыз кылуу жана кайра иштетүү тармагын чыңдоо өлкөнүн агроөнөр жай саясатынын маанилүү багыттарынын бири.
Иш сапардын алкагында министр Бакыт Төрөбаев ата мекендик өндүрүштү колдоо, кайра иштетүү тармагын кеңейтүү жана аймактардагы ишканалардын потенциалын жогорулатуу зарылдыгын белгиледи.
