Бишкек, 21.02.25. /Кабар/. Министрлер кабинетинин төрагасы Адылбек Касымалиев өлкөнүн өнүгүшүнө жана гүлдөшүнө зор салым кошкон бир катар атуулдарга «Кара-Кыргыз автономиялык облусунун түзүлгөндүгүнүн 100 жылдыгы» юбилейлик төш белгилерин тапшырды.
Сыйлык тапшыруу аземинде минкаб башчысы Кара-Кыргыз автономиялуу облусунун түптөлүшүнүн кыргыз мамлекеттүүлүгүн өнүктүрүүдөгү тарыхый маанисин баса белгилеп, сыйлык алгандарга өлкөнүн өнүгүшүнө кошкон салымы үчүн ыраазычылык билдирди. Ал белгилегендей, алардын эмгеги жана берилгендиги Кыргызстандын жыргалчылыгы үчүн жаңы жетишкендиктерди ээрчүүгө жана шыктандырууга үлгү болот.
Кыргыз мамлекеттүүлүгүнүн башаты Жусуп Абдрахманов, Иманалы Айдарбеков, Ишеналы Арабаев, Абдыкадыр Орозбеков, Абдыкерим Сыдыков жана башка чыгаан инсандардын ишмердүүлүгүнөн келип чыкканын Министрлер Кабинетинин башчысы баса белгиледи.
«Алар жаштыгына карабай, келечектеги мамлекеттин пайдубалын түптөп, элдин тагдыры үчүн жоопкерчиликти мойнуна алышты. Алардын өмүрү эгемендик үчүн күрөшкө арналып, эрдиктин, кайраттуулуктун жана баатырдыктын үлгүсү катары түбөлүккө кала берет. Мамлекет башчысы бул негиздөөчү аталардын ысымдарын сыйлангандардын катарына кошуп, муну менен алардын кыргыз мамлекеттүүлүгүн өнүктүрүүгө кошкон баа жеткис салымын баса белгиледи. Президент 1916-жылдагы трагедиядан кийин кыргыз элинин өз тагдырын өзү чечүүгө жана өз мамлекетин түзүүгө укугун коргогон инсандарга таазим кылып, аларды улуттук лидер, улут атасы деп жарыялаган», - деди Адылбек Касымалиев.
Белгилей кетсек, бул жогорку сыйлык президент Садыр Жапаровдун буйругуна ылайык ыйгарылган жана Кыргыз Республикасынын эгемендүүлүгүн бекемдөөдөгү жарандардын сиңирген эмгегин баалоо болуп саналат.
Мындан тышкары, Кыргыз Республикасынын мамлекеттик кызматкерлерине класстык чендерди тапшыруу аземи болуп өттү. Иш-чаранын жүрүшүндө минкаб башчысы мамлекеттик кызматкерлердин кесипкөйлүгүн жана эффективдүүлүгүн жогорулатуу үчүн класстык чендерди берүүнүн маанилүүлүгүн баса белгилеп, алардын өлкөнүн жыргалчылыгы үчүн иштеринде мындан аркы ийгиликтерди каалады.
