Бишкек, 31.07.26. /Кабар/. Агартуу министрлигинин колдоосу менен ишке ашырылып жаткан "Заманбап мугалим" программасынын биринчи бүтүрүү аземи өттү.
Ведомстводон маалымдашкандай, программанын алгачкы эки жылын 25 жаш адис аяктады. Алар эки жыл ичинде Чүй облусундагы 12 мектепте иштеп, 8 миңден ашуун окуучуну камтыган билим берүү жана социалдык долбоорлорду ишке ашырышты.
Катышуучулар сабак берүү менен катар экологиялык демилгелерди, чыгармачылык жана медиа клубдарды, мектептик иш-чараларды уюштуруп, окуучулардын өнүгүүсүнө багытталган иштерди жүргүзүштү.
Ошондой эле алар Борбор Азиянын Эл аралык университетинин "Өзгөрүүлөр шартындагы педагогика" магистрлик программасында билим алышты. Изилдөөлөрүндө жасалма интеллектти билим берүүдө колдонуу, окуучулардын чыгармачылыгын өнүктүрүү жана окууга кызыгуусун арттыруу маселелерине көңүл бурушту.
"Заманбап мугалим" программасы эл аралык Teach For All тармагынын мүчөсү болуп саналат жана билим берүү тармагына жаңы ыкмаларды киргизүүгө багытталган.
