Бишкек, 03.04.25. /Кабар/. Бүгүн Транспорт жана коммуникациялар министрлигинин 2025-2030-жылдарга аткарылуучу иш пландары каралган жыйын өттү. Бул тууралуу ведомстводон маалымдашты.
Жыйынга министрлер кабинетинин төрагасынын орун басары – суу ресурстары, айыл чарба жана кайра иштетүү өнөр жайы министри Бакыт Төрөбаев төрагалык кылды. Ага министр Абсаттар Сыргабаев, анын орун басарлары жана бөлүм башчылар катышты.
Министрлик тарабынан келерки 5 жылдыкта ишке ашырылуучу негизги багыттар боюнча иш-аракеттери жана күтүлүп жаткан натыйжалар айтылды.
Талкуунун жүрүшүндө транспорттук тармактын туруктуу өнүгүүсүн камсыз кылуу, жол-транспорттук коопсуздукту жогорулатуу, санариптик технологияларды жакшыртуу маселелери көтөрүлдү.
Жыйынтыгында министрликке тиешелүү тапшырмалар коюлуп, ишти натыйжалуу аткаруу белгиленди.
