Бишкек, 28.04.26 /Кабар/. Бишкекте "Ала-Арча" мамлекеттик резиденциясында Шанхай кызматташтык уюмуна мүчө мамлекеттердин коргоо министрлеринин жыйыны өттү.
Алгач Коргоо министрликтеринин башчылары жана делегациялардын мүчөлөрү президент, Куралдуу күчтөрдүн башкы кол башчысы Садыр Жапаров менен жолугушту.
Андан соң ШКУга мүчө мамлекеттердин коргоо министрлеринин жыйыны өтүп, ага Кыргызстандын коргоо министри Руслан Мукамбетов төрагалык кылды.
Муканбетов белгилегендей, бул жыйын маанилүү, тарыхый учурда – уюмдун түзүлгөнүнүн 25 жылдыгында өтүп жатат.
“Бул иш-чараны "ШКУнун 25 жылы: Туруктуу тынчтык, өнүгүү жана гүлдөп-өнүгүү үчүн бирге" деген ураан астында өткөрүп жатабыз", - деди ал.
Мукамбетовдун пикиринде, бүгүнкү күндө уюм аймактык туруктуулуктун ишенимдүү кепили болуп кызмат кылат.
“Ошол эле учурда, өз ара ишенимди бекемдөө жана аскердик чөйрөдө ачыктыкты камсыз кылуу биздин коргонуу жаатындагы негизги артыкчылыктарыбыз бойдон калууда. Биз ачык диалог жана алдын ала айтууга боло турган аракеттер аркылуу гана тынчтыкты сактап, элдерибиздин коопсуздугун ондогон жылдар бою камсыздай алабыз деп ишенебиз”, - деди ал.
Мүчө мамлекеттердин коргоо министрлеринин жолугушуусун жыйынтыктап жатып, Руслан Мукамбетов делегациялардын жетекчилерине жемиштүү жана натыйжалуу иши үчүн ыраазычылык билдирди.
Ошондой эле Коргоо министрлиги уюмга мүчө мамлекеттердин бардык коргоо ведомстволору менен конструктивдүү жана өз ара пайдалуу өнөктөштүктү тереңдетүүгө ар дайым ачык экенин, муну жалпы ийгиликтин ачкычы катары көрөрүн баса белгиледи.
“Мен тилектештиктин, өз ара ишенимдин жана жамааттык жоопкерчиликтин бекем пайдубалына таянуу менен гана биз учурдун чакырыктарына каршы туруштук бере алабыз”, - деп кошумчалады ал.
Белгилей кетсек, жыйындын соңунда келишимдерге кол коюлду.
